మల్లెలన్ని కలసి
కన్న ఓ కల
బాంబుల దాడిలో ధ్వంసమైంది
పువ్వులు గుత్తులుగా గాక
ఒంటరిగానే పూయాలని
అధికారిక గెజిట్ ప్రకటన
కల ఇప్పుడు
రాజద్రోహం
రాజు ఉన్నంత కాలం
రాచరికాన్ని కూల్చే
అరాచక ప్రకటన
ఓ ధిక్కార కల
మల్లెలిపుడు
నెత్తురోడుతున్న విషాద దృశ్యం
మల్లెలది
ధ్వంసమైన స్వప్నం
మల్లెల మధ్యదార
ఇప్పుడొక నెత్తుటి మడుగు
తీరని చమురు దాహంతో
మట్టికాళ్ళ మహారాక్షసి
దానికి దూపేసినప్పుడల్లా
రక్తపు పంపులయ్యే దేశాలు
ఇప్పుడు దేశాలకు దేశాలే
కఫన్ కప్పబడ్డ దేహాలు
మొన్న ఇరాక్
నిన్న లిబియా
నేడు సిరియా
రేపు....
.........నేను
లేదంటే
............నువ్వు
(విరసం నిర్వహించిన 'సిరియా సంఘీభావ కవిసమయం'లో రాసింది)
9/3/18
7.30 PM (SVK)
No comments:
Post a Comment