సిగరెట్ ని శ్వాసలా ఎగబీలుస్తుంటే
మండిపోతున్న పొగాకులా ఉంది హృదయం
రోలింగ్ పేపర్ చప్పుడును తలపిస్తూ
దేహాంతరాల్లో ఏదో పెటిల్మని పగులుతున్న భావన
మది మసైపోతుందని తెలిసినా
నీ స్మృతుల్నే నిలుపుకున్నాను
వేదనాభరిత రాత్రుల్ని తట్టుకునేందుకు
మత్తునాశ్రయించాను
రాత్రులందు నీ జ్ఞాపకాల్లో
నన్ను నేను కాలబెట్టుకున్నాక
ఉదయాన్నే కొత్తగా లేస్తాను
రాత్రికి మరోసారి మండిపోయేందుకు
రగిలే నీ యాదుల కాష్టంలో
నే ఓ దగ్ధ గీతం
No comments:
Post a Comment