●
ఏమైందనిప్పుడు
వాడు భాగహారాలు చేసి విభజించిన చోటే
తీసివేతల్లో పోయినవి పోయాక
మిగిలినవాటిని కూడికలుగా ఓ చోట కూడుదాం
అంకెలుగానో... మనుషులుగానో...
బతుకు బజారైందని బేజారయ్యే బదులు
ఎప్పటిలాగే బజారెంబడి బాటను
పోరు క్షేత్రం చేసుకుందాం
ధర్నాగానో... ర్యాలీగానో...
ద్వేషమే చట్టమై రాజ్యమేలు కాలనా
వేలికోస నుండి ప్రేమవాక్యమొకటి జాలువార్చుదాం
వొట్టి వచనంగానో... చిక్కటి కైతగానో...
●
ఈ క్షణాన దీన్ని ఓడిస్తామనేది
వొఠ్ఠి ఉటోపియన్ కలగావొచ్చు
నా భలీయమైన కోర్కేగావొచ్చు
కానీ, అది రేపటి వాస్తవం
ఈ పూటకి నేనొక్కడినేగావొచ్చు
మాదొక గుంపేగావొచ్చు
రేపటి కాలాన అదే జనసంద్రంగావొచ్చు
నడుస్తున్న రోడ్డుమీదోట్టు
రేపటి లక్షాన్ని చేరేది
ఈ రోడ్డుమీదుగానే
రోడ్డున్నంతవరకు పోరాటముంటుంది
పోరాటమున్నంతవరకు గెలుస్తామనే ఆశా ఉంటుంది
24/05/2019
No comments:
Post a Comment